आधुनिक शेती लाखमोलाची

शेती आता केवळ पारंपरिक पद्धतीने करण्याचा व्यवसाय राहिलेला नाही. यामध्ये सातत्याने काहीतरी नवीन प्रयोग केल्यास उत्पन्नात वाढ होऊ शकते. बुलढाणा जिल्ह्याच्या सिंदखेडराजा तालुक्यातील शेलगाव राऊत येथील अल्पभूधारक शेतकरी श्रीमंत रामभाऊ राऊत यांनी दहा गुंठे शेडनेटमध्ये सिमला मिरचीची लागवड करुन हेच सिद्ध करून दाखविले आहे. त्यांनी याद्वारे दीड लाखांचे उत्पन्न घेतले आहे. अजूनही उत्पादन सुरू असून त्यातून त्यांना किमान ५० हजार रुपयांचे उत्पन्न अपेक्षित आहे.

श्रीमंत राऊत यांनी पारंपरिक शेती करुन शेती आर्थिकदृष्ट्या परवडत नसल्याने आधुनिक शेतीची कास धरली आहे. यासाठी तालुका कृषी कार्यालयाचे कृषी सहायक एस.पी.बंडगर, कृषी केंद्र चालक श्रीकृष्ण ढवळे यांच्यासोबत चर्चा करुन त्यांनी दहा गुंठ्यावर नेटशेडमध्ये सिमला मिरची लागवड करण्याचा निर्णय केला. वाणाची निवड केल्यानंतर सिमला मिरचीची रोपे घरीच तयार करण्यात आली.

लागवडीपूर्वी दहा गुंठ्यात नेट उभे करुन जमिनीवर चांगले कुजलेले शेणखत घातले. त्यात तीन फूट रुंदीचे बेड तयार केले. बेड तयार झाल्यावर दीड फूट अंतरावर मिरचीची लागवड करण्यात आली. लागवडीनंतर नियोजन करून वेळोवेळी खतांची मात्रा दिली. दोन महिन्यानंतर या मिरचीची पहिली तोडणी केली. यानंतर दर तिसऱ्या दिवशी मिरची विक्रीसाठी तयार होत आहे.

सिमला मिरची विक्रीसाठी जिल्ह्यातील मेहकर तसेच जालना या दोन बाजारपेठेत नेली जाते. तेथे मिरचीला सरासरी २० रुपये किलो हा दर मिळाला. या पिकाद्वारे आतापर्यंत निव्वळ दीड लाखांचा नफा मिळाला असून अजून दोन महिने उत्पादन निघणे अपेक्षित आहे. त्यातूनही किमान ५० हजार रुपये मिळतील अशी खात्री राऊत यांनी व्यक्त केली आहे.

पारंपरिक शेती करून नेहमीच्याच पिकांवर अवलंबून न राहता राऊत यांनी सिमला मिरचीची लागवड केली आणि त्यांना उत्कृष्ट नफा मिळाला. यामुळेच आज काळाची गरज म्हणून शेतकऱ्यांनी आधुनिक शेतीकडे वळावे असा सल्ला त्यांनी दिला आहे.