पदवीधर मतदारांनो… असे करा मतदान

महाराष्ट्र विधान परिषदेसाठी कोकण पदवीधर, मुंबई शिक्षक आणि मुंबई पदवीधर या तीन विधानपरिषद मतदार संघाची द्विवार्षिक निवडणूक दि. 2 जुलै, 2012 रोजी होत आहे. सकाळी 8 ते 4 या वेळात मतदान करता येईल. सर्वसाधारणपणे या निवडणूकीसाठी मतदारांची ओळख पटावी यासाठी ग्राह्य पुरावे काय असावेत असा प्रश्न उपस्थित होतो. यासाठीच ग्राह्य कागदपत्रांची माहिती येथे देत आहे.

पासपोर्ट, वाहन चालविण्याचा पुरावा, आयकर विभागाकडील ओळखपत्र (पॅनकार्ड), केंद्र शासन/राज्य शासन/सार्वजनिक उपक्रम/स्थानिक स्वराज्य संस्था/सार्वजनिक मर्यादित कंपन्या यांनी आपल्या कर्मचाऱ्यांना दिलेली छायाचित्रे असलेली ओळखपत्रे, छायाचित्र असलेले बँकेचे/पोस्टाचे/किसान पासबुक, छायाचित्र असलेले स्वातंत्र्य सैनिकांचे ओळखपत्र, सक्षम प्राधिका-याने अनुसूचित जाती/अनुसूचित जमाती/इतर मागासवर्ग इत्यादींना दिलेले छायाचित्र असलेले जातीचे प्रमाणपत्र, सक्षम प्राधिकारी यांनी दिलेले छायाचित्र असलेले अपंगत्वाचे प्रमाणपत्र, शस्त्रास्त्र परवाना, एनआरईजीएस राष्ट्रीय ग्रामीण रोजगार हमी योजने अंतर्गत दिलेले छायाचित्र असलेले जॉब कार्ड, छायाचित्र असलेले मालमत्ताबाबतचे कागदपत्रे तसेंच नोंदणीकृत करारपत्र इत्यादी, निवृत्त कर्मचा-यांचे छायाचित्र असलेले पेन्शन पासबुक/पेन्शन पेमेंट ऑर्डर/माजी सैनिक पेन्शन पासबुक/माजी सैनिक पत्नी, आरोग्य विमा योजने अंतर्गत छायाचित्र असलेले स्मार्टकार्ड, शिधापत्रिका इत्यादी वरील 14 पुराव्यांपैकी कोणताही एक पुरावा असणे आवश्यक आहे. यापैकी एक ग्राह्य पुरावा असल्यानंतर प्रत्यक्ष मतदान कसे करावे हा प्रश्न उभा राहतो, यासाठीच खालील काही सूचना...

1. मतदान करण्यासाठी निवडणूक अधिकाऱ्याने पुरविलेले जांभळ्या रंगाचे स्केच पेनच वापरा. मतपत्रिकेबरोबर हे स्केच पेन तुम्हाला देण्यात येईल. अन्य कोणतेही पेन, पेन्सिल,बॉलपॉईन्ट पेन किंवा अन्य कोणतेही लेखनाचे साधन मतदानासाठी वापरु नका कारण त्यामुळे तुमची मतपत्रिका अवैध ठरेल.

2. उमेदवाराच्या नावाच्या स्तंभासमोर पसंतीक्रम म्हणून असलेल्या स्तंभामध्ये तुम्ही प्रथम पसंतीच्या उमेदवार म्हणून निवडलेल्या उमेदवाराच्या नावासमोर 1 असा आकडा लिहून मतदान करा. हा 1 हा आकडा फक्त एकाच उमेदवाराच्या नावासमोर घाला.

3. एकापेक्षा अधिक उमेदवारांची निवड करावयाची असली तरी देखील 1 हा आकडा फक्त एकाच उमेदवाराच्या नावासमोर घाला.

4. निवडून द्यावयाच्या उमेदवारांची संख्या विचारात न घेता, जेवढे उमेदवार निवडणूक लढवत असतील तेवढे पसंतीक्रम तुम्हाला देता येतील. उदाहरणार्थ, दोन उमेदवार निवडणूक लढवत असतील आणि फक्त एकच उमेदवार निवडून द्यावयाचा असला तरीही तुम्हाला तुमच्या निवडीच्या पसंतीक्रमाने उमेदवारांच्या नावासमोर 1 ते 2 असे आकडे घालता येतील.

5. उर्वरित उमेदवाराबाबतचा तुमचा पुढील पसंतीक्रम अशा उमेदवाराच्या नावासमोर असलेल्या पसंतीक्रम या स्तंभामध्ये तुमच्या पसंतीक्रमानुसार 2 इत्यादी आकडे घालून दर्शवा.

6. कोणत्याही उमेदवाराच्या नावासमोर फक्त एकच आकडा तुम्ही घातलेला आहे. याची खात्री करुन घ्या. तसेच तोच आकडा एकापेक्षा अधिक उमेदवारांच्या नावासमोर घातलेला नाही याची देखील खात्री करुन घ्या.

7. हा पसंतीक्रम फक्त 1,2 ..... इत्यादी आकड्यांमध्येच दर्शवा. एक, दोन, तीन इत्यादी शब्दांमध्ये दर्शवू नका.

8. हे आकडे भारतीय अंकांच्या 1,2 ... इत्यादीसारख्या आंतरराष्ट्रीय रुपात किंवा I, II… इत्यादी सारख्या रोमन रुपात किंवा 1,2 अशा देवनारी रुपात किंवा संविधानाच्या अनुसूची आठमधील मान्यता दिलेल्या कोणत्याही एका भारतीय भाषेमध्ये वापरण्यात येणा-या रुपामध्ये चिन्हांकित करता येतील.

9. मतपत्रिकेवर तुमचे नांव लिहू नका किंवा अन्य शब्द लिहू नका, किंवा तुमची स्वाक्षरी या आद्याक्षरे करु नका. तसेच तुमच्या अंगठयाचा ठसा देखील उमटवू नका. यामुळे तुमची मतपत्रिका अवैध ठरेल.

10. तुमचा पसंतीक्रम दर्शविण्यासाठी तुमच्या निवडीच्या उमेदवाराच्या नावासमोर  अशी किंवा X अशी खूण करणे पुरेसे होणार नाही. अशा मतपत्रिका बाद करण्यात येतील. वर स्पष्ट केल्याप्रमाणे तुमचा पसंतीक्रम फक्त 1, 2 इत्यादी आकडयांमध्ये दर्शवा. आपला मतदानाचा हक्क बजावणे हे आपले कर्तव्यच आहे हे लक्षात ठेवा.

11. तुमची मतपत्रिका वैध ठरण्यासाठी तुम्ही उमेदवारांपैकी एका उमेदवारांसमोर 1 हा आकडा लिहून तुमची पहिली पसंती दर्शविणे आवश्यक आहे. इतर पसंतीक्रम देणे ऐच्छिक आहेत. म्हणजेच तुम्ही तुमची दुसरी किंवा पुढील पसंती दर्शवा अथवा दर्शवू नका.

अवैध मतपत्रिका :-
1. 1 हा आकडा घातलेला नसेल.
2. 1 हा आकडा एकापेक्षा अधिक उमेदवारांच्या नावासमोर घातलेला असेल.
3. 1 हा आकडा तो कोणत्या उमेदवाराला देण्यासाठी घातलेला आहे. याबाबत संदेह निर्माण
होईल अशा प्रकारे घातलेला आहे.
4. एकाच उमेदवाराच्या नावासमोर 1 आणि त्याबरोबर 2.. इत्यादी आकडे देखील घातलेले
असतील.
5. पसंतीक्रम आकडयांऐवजी शब्दांमध्ये दर्शविलेला असेल.
6. मतदारांची ओळख पटू शकेल अशी कोणतीही खूण किंवा लेखन असेल.
7. असे आकडे घालण्यासाठी निवडणूक अधिका-याने दिलेल्या पेन व्यतिक्ति अन्य साधनाने कोणताही आकडा घातलेला असेल तर अशी मतपत्रिका बाद ठरेल.

निवडणूक भले कोणतीही असो मतदारांनी जागृत राहून मतदानाचा हक्क बजावणे आवश्यक आहे...

विभागीय माहिती कार्यालय, कोकण विभाग, नवी मुंबई